АХҚО Экспат орталығы мен KAZAKH INVEST инвесторлар мен таланттарды қолдау үшін күш біріктіреді
4 қыркүйекте Astana Finance Days 2025 форумы аясында «АХҚО Диалогы: Жаһандық ұтқырлық үшін стратегиялық инвестициялар» панельдік сессиясы өтті. Оның негізгі тақырыбы Қазақстанның шетелдік инвесторлар мен халықаралық мамандар үшін болашағы зор бағыт ретінде тартымдылығының артуы болды.
Спикерлер – «Kazakh Invest» ҰК» АҚ басқарма төрағасының орынбасары Мадияр Сұлтанбек пен Legal Consulting Community Ltd. компаниясының комплаенс және қаржылық мониторинг жөніндегі сарапшысы Ерлан Мұхан – АХҚО-ның инвестициялық салық резиденттігі бағдарламасының Қазақстан экономикасына капитал тартуға ашатын мүмкіндіктерін, сондай-ақ инвесторларды қолдау үшін мемлекет пен бизнестің күш біріктіруінің маңыздылығын талқылады.
АХҚО Экспат орталығының директоры, сессия модераторы Айнұр Жұматова былай деп атап өтті: «АХҚО Экспат орталығы “бір терезе” қағидаты бойынша жұмыс істеп, шетелдік инвесторларға, мамандарға және олардың отбасыларына Қазақстанда болу үшін қажетті мемлекеттік қызметтерді алуда жан-жақты қолдау мен сүйемелдеу көрсетеді. Біздің орталық мемлекеттік органдармен, сарапшылық қауымдастықпен және инвесторлармен өзара іс-қимыл жасауға арналған диалог алаңы болып та қызмет етеді. Мұнда инвестициялық ахуалды жақсартуға, әкімшілік рәсімдерді жеңілдетуге және шетелдік инвесторлар мен таланттар үшін жайлы жағдайларды жетілдіруге бағытталған ұсыныстар талқыланады және жобалар бастамашылық етеді. Біздің фронт-офистерімізді АХҚО базасында біріктіру шетелдік инвесторлар мен халықаралық мамандарды қабылдау үшін “бір терезе” қағидатын жүзеге асырудың үйлестірілген әрі тиімді тәсілі болып саналады».
Өз кезегінде «KAZAKH INVEST» ҰК» АҚ басқарма төрағасының орынбасары Мадияр Сұлтанбек шетелдік инвесторларды қолдау жөніндегі мемлекеттік стратегияларды нақты шараларға айналдырудағы компанияның рөлін таныстырды. Спикер олардың қатарында процестерді цифрландыруды, “one-stop shop” механизмін енгізуді, сондай-ақ жобаларды іске асырудың барлық кезеңдерінде инвесторларға белсенді сүйемелдеу көрсетуді атады.
Мадияр Сұлтанбек:«Біз үшін цифрландыру үлкен мәнге ие. Ұлттық цифрлық инвестициялық платформа енгізілді, “бір терезе” механизмі жетілдіріліп жатыр, “Жасыл дәліз” іске қосылды, инвесторлардың өтініштерінің бірыңғай тізілімі жүргізіліп жатыр, аймақтық инвестициялық бағдарламалар әзірленуде. Осылайша, Қазақстанда халықаралық тәжірибеге негізделген қолдау шараларының кең спектрі жүзеге асырылып отыр, бұл елді ұзақ мерзімді инвестициялар үшін тартымды етеді», — деді өз сөзінде.
Сонымен қатар сессия барысында АХҚО-ның инвестициялық салық резиденттігі бағдарламасына ерекше назар аударылды: оның дамуы, халықаралық стандарттарға бейімделуі және инвесторлардың өзгермелі қажеттіліктеріне сәйкес кеңеюі талқыланды.
Legal Consulting Community Ltd. компаниясының (АХҚО инвестициялық салық резиденттігі бағдарламасының агенті) комплаенс және қаржылық мониторинг жөніндегі сарапшысы Ерлан Мұхан былай деді:
«Инвестициялық салық резиденттігі бағдарламасы АХҚО юрисдикциясының маңызды элементі, өйткені дәл осы бағдарламада шетелдік инвесторлардың Қазақстанда жұмыс істеуі үшін қолайлы жағдай жасалған. Шын мәнінде, мемлекет пен АХҚО әкімшілігінің серіктестігі негізінде 2022 жылы Қазақстан экономикасына инвестиция салудың ашық әрі өзара тиімді тетігі құрылды. Инвестор инвестициялық резидент мәртебесін алғаннан кейін шетелдегі табыстарын салықтан босатып қана қоймай, сонымен қатар ұзақ мерзімді виза немесе елде уақытша тұруға рұқсат алу мүмкіндігіне ие болады».
Қазіргі уақытта шетелдік инвесторға екі құрал қолжетімді:
- AIX биржасында белсенді түрде саудаланатын қазақстандық эмитенттердің бағалы қағаздарына қаражат салу;
- АХҚО-да тіркелген жекеменшік компаниялардың жарғылық капиталына инвестиция салу.
Екінші құралдың пайда болуы инвесторларға АХҚО базасындағы орнықты жобаларға қатысу мүмкіндігін кеңейтеді.
Талқылаудың қорытындысында Экспат орталығы базасында біздің фронт-офистерімізді біріктіру арқылы инвесторларды қолдау шараларын күшейту және клиентке бағытталған тәсілді қамтамасыз ету жария етілді. Біріктірілген фронт-офис форматындағы жаңа өзара іс-қимыл шетелдік инвесторларға визалық және әкімшілік қызметтерден бастап, консультациялық сүйемелдеуге дейінгі жан-жақты қолдауды «бір терезе» қағидаты бойынша бір кеңістікте алуға мүмкіндік береді.
Бұл жаңашылдықтың арқасында АХҚО-ның инвестициялық салық резиденттігі бағдарламасының шарттары инвесторлар үшін тартымдырақ бола түсті, өйткені енді олар 300 мың АҚШ долларынан бастап инвестиция салған жағдайда алтын виза мен тұруға ықтиярхат алуға үміткер бола алады.
Сессия АХҚО Экспат орталығының шетелдік инвесторларға жан-жақты қолдау көрсететінін, инвестициялық салық резиденттігі сияқты жаңа құралдар, бағдарламалар мен өнімдерді енгізу арқылы қолайлы жағдай жасайтынын, ұлттық заңнама аясында инвестициялық климатты жақсарту мәселелері бойынша мемлекеттік органдармен белсенді ынтымақтасатынын, сондай-ақ Қазақстанда болуға қатысты визалық-миграциялық құжаттар мен мемлекеттік қызметтерді алу сияқты практикалық мәселелерді шешуде толық сүйемелдеу ұсынатынын айқындады.
Анықтамалық ақпарат:
АХҚО Экспат орталығы – шетелдік инвесторлардың, АХҚО қатысушыларының қызметкерлерінің және Астанаға келген шетелдік азаматтар үшін ел аумағында болуына қолайлы жағдайлар жасауға, сондай-ақ шетелдік азаматтардың қазақстандық қоғамға кедергісіз кірігуін қамтамасыз етуге арналған мамандандырылған көпфункционалды орталық. Экспат орталығы мемлекеттік қызметтердің кең спектріне, сондай-ақ ағылшын тілінде «бір терезе» қағидаты бойынша әлеуметтік интеграция қызметтеріне қолжетімділікті ұсынады.
