АХҚО мен ҚР Ұлттық Банкі Ұлттық валюта күніне орай Сенім музейі мен алтын монеталар топтамасын жұртшылыққа таныстырды
Қазақстанның Ұлттық валюта күні қарсаңында «Астана» халықаралық қаржы орталығында (АХҚО) АХҚО корпоративтік Сенім музейі мен Қазақстан Ұлттық Банкінің алтын монеталар топтамасының бірлескен көрсетілімі өтті. Іс-шараға БАҚ өкілдері, экономика, мәдениет және тарих саласындағы сарапшылар жиналды.
АХҚО Сенім музейінің көрсетілімі кездесудің басты оқиғасы болды. Жаңа музей Қазақстанның қаржылық қатынастарының тарихы сенім призмасы – экономиканың тұрақты дамуының негізгі факторы арқылы ашылатын институционалдық жады кеңістігі ретінде ойластырылған.
Музей экспозициясы Ұлы Жібек жолы дәуірінен бастап «Астана» халықаралық қаржы орталығының қазіргі даму кезеңіне дейінгі елдің қаржы жүйесінің қалыптасуы туралы баяндайды.
Музейде жеті тақырыптық зал бар және оларда 40-тан астам сирек жәдігер: көне монеталар, салмақ өлшегіштер, тарихи құжаттар, ХХ ғасырдың басындағы облигациялар мен акциялар, сондай-ақ тәуелсіз Қазақстанның алғашқы ақшасы қойылған. Заманауи интерактивті инсталляциялар мен арт-объектілер тарих пен цифрлық болашақ арасында көпір жасайды. Astana International Exchange (AIX) биржасының эмитенттерінің нақты уақыттағы баға белгілеулерін көрсететін цифрлық шаңырақ келушілердің ерекше қызығушылығын тудырды.
«Сенім музейін ашу қаржы орталығының қаржылық инфрақұрылымы мен қаланың мәдени бастамаларының синергиясын дамытудағы маңызды қадам болды. АХҚО бұл процесте қаржы орталығы ретінде ғана емес, қазіргі заманғы экономика мен халықаралық ынтымақтастықтың өзегі – сенім, уағдаластықтар мен кепілдіктер дәстүрі жалғасқан алаң ретінде де әрекет етеді», – деп атап өтті ұйымдастырушылар.
Іс-шара бағдарламасында еліміздің бай мәдени және тарихи мұрасын бейнелейтін Қазақстан Республикасы Ұлттық Банкінің алтын монеталар топтамасының көрсетілімі ерекше орын алды. Әрбір монета – маңызды тарихи оқиғалардың, мемлекеттіліктің нышандары мен ұлттық құндылықтардың көркем бейнесі.
Іс-шара бағдарламасының соңында «Қаржы» тақырыбындағы интерактивті квиз өтті, оның барысында қатысушылар теңге тарихы мен Қазақстанның қаржы жүйесі туралы білімдерін тексерді.
Анықтамалық ақпарат:
«Астана» халықаралық қаржы орталығы (АХҚО) – бизнесті ашу және жүргізу, инвестициялар тарту, жұмыс орындарын құру және Қазақстан экономикасын дамыту үшін қолайлы құқықтық және реттеуші ортасы әрі дамыған инфрақұрылымы бар тәуелсіз юрисдикция. www.aifc.kz
АХҚО баспасөз қызметі
Айнұр Исабаева, баспасөз хатшысы
Тел: +7 701 777 65 58
E-mail: [email protected]
