Astana International Exchange QazaqGaz еурооблигацияларының листингін құптайды
Astana International Exchange («AIX», «Биржа») Қазақстан Республикасының «QazaqGaz» ұлттық компаниясы АҚ («QazaqGaz») шығарған еурооблигациялардың листингі туралы хабарлайды.
АҚШ долларымен шығарылған облигациялардың көлемі 700 млн құрайды, айналым мерзімі он жыл, ал купондық мөлшерлемесі жылына 5,625% деңгейінде белгіленген, төлемдер жарты жыл сайын жүзеге асырылады.
Мәміле бойынша бірлескен жаһандық координаторлар ретінде Citi және J.P. Morgan, жергілікті жетекші менеджер ретінде Halyk Finance, ал жергілікті қосалқы менеджер ретінде Freedom Broker әрекет етті.
AIX Басқарма төрайымы Асель Мұқажанова былай атап өтті:
«QazaqGaz компаниясының AIX алаңында листингі компания үшін де, жалпы нарық үшін де маңызды қадам болып табылады. Жаңа эмитент ретінде QazaqGaz қаржыландыру тарту құралдарын кеңейтіп, халықаралық инвесторлар арасындағы өз қатысуын күшейтуде. Сонымен қатар, бұл мәміле Қазақстанның капитал нарығының неғұрлым әртараптандырылған және орнықты экожүйесін дамытуға ықпал етеді».
Бұл листинг AIX-тің қарыз капиталы нарығының өңірлік орталығы ретіндегі позициясын одан әрі нығайтып, халықаралық инвесторларға қолжетімділікті кеңейту бағытындағы жүйелі жұмысты көрсетеді.
Анықтамалық ақпарат:
AIX 2017 жылы «Астана» халықаралық қаржы орталығын дамыту аясында құрылды. AIX акционерлері қатарында АХҚО, Шанхай қор биржасы, Жібек Жолы Қоры және AIX сауда платформасын ұсынатын NASDAQ биржасы бар. Биржа ағылшын құқығы қағидаттарына негізделген нормативтік-құқықтық орта аясында жұмыс істейді, осылайша сенімді инвестициялық ортаны қамтамасыз етеді. Толығырақ: www.aix.kz
«Астана» халықаралық қаржы орталығы (АХҚО) — халықаралық стандарттарға сай ашық әрі тиімді бизнес жүргізуге, инвестиция тартуға және жаңа өнімдер мен қызметтерді енгізу арқылы елдің қаржы нарығын дамытуға арналған экожүйе. aifc.kz
