Черногория Президенті «Астана» халықаралық қаржы орталығына барды
Черногория Президенті Яков Милатович ресми сапары аясында «Астана» халықаралық қаржы орталығына (АХҚО) барып, Орталықтың негізгі институттарының қызметімен, оның құқықтық және реттеушілік инфрақұрылымымен, сондай-ақ Қазақстан мен Черногория арасындағы инвестициялық және іскерлік ынтымақтастықты дамыту мүмкіндіктерімен танысты.
Сапар барысында Черногория Президенті АХҚО Соты мен Халықаралық төрелік орталығына, АХҚО Қаржылық қызметтерді реттеу комитетіне (AFSA) және Экспат орталығына барды.
АХҚО Басқарушысы Ренат Бектұров делегацияға Орталық қызметінің негізгі бағыттарын және оның Қазақстанға, Орталық Азияға және Еуразия өңіріне халықаралық капитал тартуға арналған жетекші қаржылық платформа ретіндегі рөлін таныстырды. АХҚО іске қосылған сәттен бері Қазақстан экономикасына тартылған инвестициялардың жиынтық көлемі $25,3 млрд құрағаны атап өтілді. Бүгінде Орталықта әлемнің 90 елінен 5 800 астам компания тіркелген. АХҚО қатысушылары мемлекеттік бюджетке 317,4 млрд теңге көлемінде салық төледі (2026 жылдың бірінші тоқсанындағы жағдай бойынша).
АХҚО таныстырылымы барысында тараптар қаржылық қызметтер, инвестициялар, қаржы секторын реттеу салаларындағы, сондай-ақ екі ел арасындағы іскерлік байланыстарды дамытудағы өзара әрекеттесу перспективаларын талқылады.
Черногория Президентінің сапары Қазақстан мен Черногория арасындағы екіжақты ынтымақтастықтың нығаю кезеңіне келді.
2025 жылдың қорытындысы бойынша екі ел арасындағы өзара сауда көлемі $3,2 млн құрады. 2026 жылдың қаңтар–сәуір айларында тауар айналымы $256,5 мыңға жетті. Черногориядан Қазақстанға импортталатын негізгі тауарлар қатарында дәрілік заттар, жабдықтар мен көлік құралдарына арналған механизмдер, сондай-ақ азық-түлік өнімдерінің жеке санаттары бар. Бұл ретте дәрілік заттар ең ірі тауарлық санат болып табылады: 2025 жылдың қорытындысы бойынша олардың импортының көлемі $1,9 млн жетіп, Черногориядан Қазақстанға импорттың жалпы көлемінің 59,3% құрды.
Инвестициялық ынтымақтастық әлеуеті қаржылық қызметтер, туризм, инфрақұрылымдық жобалар, жаңартылатын энергетика және жасыл экономика сияқты бағыттарда сақталуда.
Қазіргі уақытта Қазақстанда Черногория капиталының қатысуымен 17 кәсіпорын тіркелген (2026 жылғы 1 мамырдағы жағдай бойынша). АХҚО черногориялық серіктестермен өзара әрекеттесуді кеңейту үшін инвесторларды тарту, қаржылық қызметтерді дамыту, инвестициялық жобаларды құрылымдау және Орталық Азия мен Еуропа арасындағы іскерлік байланыстарды нығайту сияқты мүмкіндіктерді қарастырады.
Анықтамалық ақпарат:
«Астана» халықаралық қаржы орталығы (АХҚО) – бизнесті халықаралық стандарттарға сай ашық әрі тиімді жүргізуге, инвестиция тартуға және жаңа өнімдер мен қызметтерді енгізу арқылы елдің қаржы нарығын дамытуға арналған экожүйе. aifc.kz
АХҚО баспасөз қызметі
Айнұр Исабаева, баспасөз хатшысы
E-mail: [email protected]
