АХҚО-ның қатысушы компаниясы Қазақстанның батысында мыс кен орнын игерумен айналысады

Ақтөбе облысының әкімдігі, қытайлық ірі тау-кен компаниясы және «Астана» халықаралық қаржы орталығында тіркелген SM Minerals компаниясы стратегиялық ынтымақтастық туралы уағдаласты. Кездесу өңір әкімі Асхат Шахаровтың Қытай Халық Республикасына жұмыс сапары аясында Бейжіңде өтті. Сапардың мақсаты – Қазақстанның батысында индустриялық жобаларды іске асыруға мүдделі қытайлық инвесторлармен бірқатар кездесулер өткізу.
Ақтөбе өңірі дәстүрлі түрде минералды шикізатты өндіру және қайта өңдеу секторларын қоса алғанда, қазақстандық өнеркәсіп орталықтарының бірі саналады. Сондай-ақ облыста өнеркәсіптік өндіріс, ауыл шаруашылығы, қайта өңдеу және логистика саласындағы шетелдік инвесторлармен бірлескен жобаларды іске асыру үшін зор мүмкіндіктер бар.
«Астана» халықаралық қаржы орталығы Қазақстан Республикасының ҚХР-дағы Елшілігімен ынтымақтаса отырып, аталған инвестициялық диалогтың ұйымдастырушысы әрі бастамашысы болды. Сапар нәтижелері бойынша Ақтөбе облысының аумағында бірқатар маңызды жобалар бойынша инвестициялық уағдаластықтарға қол жеткізілді.
Атап айтқанда, өңір әкімдігі, қытайлық ірі тау-кен компаниясы және SM Minerals өзара түсіністік туралы меморандумға қол қойды. Құжаттың мақсаты – Ақтөбе облысындағы мыс кен орнын игеру үшін тараптардың күш-жігерін біріктіру.
Іске асырылған жағдайда бұл жоба Ақтөбе облысының өнеркәсіптік әлеуетін арттыруға, инвестициялар тартуға, жаңа жұмыс орындарын құруға және шығарылатын өнеркәсіп өнімінің көлемін ұлғайтуға елеулі үлес қосады.
Анықтамалық ақпарат:
«Астана» халықаралық қаржы орталығы (АХҚО) – бизнесті ашу және жүргізу, инвестициялар тарту, жұмыс орындарын құру және Қазақстан экономикасын дамыту үшін қолайлы құқықтық және реттеуші ортасы әрі дамыған инфрақұрылымы бар тәуелсіз юрисдикция. www.aifc.kz