«Астана» халықаралық қаржы орталығының дамуы мәселелері жөнінде көшпелі отырыс өтті
«Астана» халықаралық қаржы орталығының (бұдан әрі – АХҚО) даму мәселелері жөнінде АХҚО Басқарушысы Қайрат Келімбетовтің, ҚР Парламенті Мәжілісінің Қаржы және бюджет, Экономикалық реформа және өңірлік даму комитеттерінің төрағалары және депутаттарының қатысуымен көшпелі отырыс өтті.
Отырыс барысында Қ. Келімбетов депутаттарды АХҚО-ның қызметімен таныстырып, оларға Орталықтың қалыптасуы мен келешегі туралы айтып берді. АХҚО Басқарушысы АХҚО-ның органдары ресми түрде 2018 жылдың 1 қаңтарынан бастап іске қосылғандығын атап өтті. АХҚО жанынан Қаржылық қызметтер көрсетуді реттеу жөніндегі комитет, АХҚО-ның тәуелсіз соты, Халықаралық төрелік орталығы, АХҚО биржасы, Expat Centre өз жұмыстарын бастады.
АХҚО қызметінің негізгі бағыттары капитал нарығы, активтерді басқару, жеке тұлғалардың дәулетін басқару, исламдық қаржы, жаңа қаржы технологиялары болып табылады.
Отырыс барысында орталықтың алдағы дамуы, АХҚО-ның Үкіметпен, мемлекеттік органдар, ұлттық компаниялар, жетекші шетелдік және қазақстандық БАҚ өкілдерімен өзара әрекеттестігі туралы мәлімет берілді.
АХҚО Басқарушысы халық қалауларын 2018 жылы 5 шілде күні АХҚО-ның халықаралық тұсаукесері аясында жоспарланған іс-шаралар туралы хабардар етті.
Шараның соңына қарай «Сұрақ-жауап» сессиясы өткізіліп, депутаттардың қойылған сұрақтарына толық ақпарат берілді.
Сұраулар:
АХҚО. 2015 жылғы желтоқсан айында Қазақстан Республикасының Президенті Нұрсұлтан Назарбаев «Астана» халықаралық қаржы орталығын (АХҚО) құру туралы Конституциялық заңға қол қойды. АХҚО-ның мақсаты қаржылық қызметтерді көрсететін халықаралық деңгейдегі жетекші орталық қалыптастыру болып табылады. Посткеңестік кеңістікте тұңғыш рет ағылшын құқығының қағидаттары енгізіледі, қаржы орталығының ресми тілі – ағылшын тілі болады.
АХҚО-ның міндеттері қаржылық қызметтер саласында инвестициялау үшін тартымды орта құру арқылы ел экономикасына инвестициялар тартуға жәрдемдесу, Қазақстан Республикасының бағалы қағаздар нарығын дамыту, оның халықаралық капитал нарықтарымен ықпалдасуын қамтамасыз ету. АХҚО сондай-ақ елімізде сақтандыру, банк қызметтері мен исламдық қаржыландыру нарығын дамытуға ниеттенеді. www.aifc.kz
